16 shtator 2026 – një ditë e rëndë për Kosovën dhe shqiptarët
Dënimi nga Haga i Hashim Thaçit, Kadri Veselit, Rexhep Selimit dhe Jakup Krasniqit është dhe do të mbetet një nga padrejtësitë më të mëdha ndaj Kosovës dhe popullit shqiptar.
Dje nuk u dënuan vetëm katër drejtues të UÇK-së. Në mënyrë të tërthortë u godit edhe UÇK-ja, lufta e saj dhe vetë vepra historike që çoi në krijimin e Kosovës së lirë.
UÇK-ja nuk lindi nga ambiciet personale të katër njerëzve. Ajo lindi nga një popull i shtypur, nga një Kosovë që për dekada kërkoi liri dhe që, përballë dhunës serbe, mori armët për të mbrojtur jetën, dinjitetin dhe të drejtën për të jetuar i lirë në tokën e vet.
Prandaj, përtej fatit juridik të katër të dënuarve, ky vendim prek edhe kujtesën e luftës së Kosovës dhe vetë historinë e çlirimit të saj.
Re të zeza duken në horizont për Kosovën, e cila sot përjeton edhe një krizë politike e institucionale. Në një moment të tillë, rreziku më i madh do të ishte që shqiptarët të humbnin besimin te vetja, te liria dhe te e drejta për ta mbrojtur të vërtetën e historisë së tyre.
Prandaj, sot është koha që të mos heshtet. Çështja e krerëve të UÇK-së duhet të mbetet në ndërgjegjen e shqiptarëve dhe në vëmendjen e opinionit publik, derisa të shterojnë të gjitha rrugët ligjore për drejtësi.
Sepse mbrojtja e dinjitetit të atyre që luftuan për lirinë e Kosovës lidhet, në ndërgjegjen e shumë shqiptarëve, edhe me mbrojtjen e vetë kuptimit të lirisë së fituar.
Mos e lini lirinë të zbehet! Mos e lini kujtesën të shuhet!
Tregohuni një popull që e di çfarë do të thotë të jesh i lirë dhe i pavarur. Sepse ajo që nuk mbrohet sot, mund të bëhet shumë më e vështirë për t’u mbrojtur nesër.
Dje u dënuan katër burra.
Por në ndërgjegjen e shqiptarëve u gjykua edhe një pjesë e historisë së Kosovës. Dhe ajo histori nuk mund të dënohet me asnjë vendim gjykate.
Kosova është e lirë. Kosova është e pavarur. Dhe liria e saj duhet të mbetet e shenjtë për çdo brez që do të vijë.
Nesim Alushani