Suksese të gjithëve atyre që punojnë me ndershmëri në arsim! Arsimi, kjo punë e rëndë si minierë!
Viktor Bakillari
Sot, më 08.09.2025, është dita e parë e vitit shkollor për arsimin parauniversitar 2025-2026.
Si “robër” të arsimit, na takon të themi dy fjalë për shkollarët tanë:
Nxënës të dashur,
Suksese! Forca dhe sa më shumë punë e lexim e sa më pak celular; sa më pak inteligjencë artificiale dhe jo kopjim dhe sa më shumë edukim qytetar dhe fizik!
“Mësonjës”, “msusa” e “dhaskenj” të paaftë, të currufjasur a mendjemykur (eh, pyll pa derra, s’ka)! Dalshi në pension deri në qershor, ose u hapshi udhën edukatorëve të përkushtuar!
Mësues dhe arsimtarë të dashur e të nderuar,
Nervave, fre, ju lutem, dhe mos u dorëzoni para sjelljeve rrugaçërore të fëmijëve të vështirë (le të hidhen përpjetë hipokritët duke mbrojtur tezën që nuk ka të tillë), mblidhuani dizgjinët të gjithëve atyre që tejngacmojnë (bullizojnë) shokët e klasës;
mos u epni përpara kërcenimeve të prindërve “dru me pre” a të tarafeve të tyre, as përpara presioneve anadollake të atyre “direktorëve” që nuk i lidh asgjë me drejtimin e shkollës.
Forca mësues dhe arsimtarë të dashur!
Juve ju ka rënë barra e rëndë që të mbani përgjegjësi e të jepni llogari për krejt brezin e ri.
Jeni e vetmja kategori e shoqërisë ku, profesioni barazohet me misionin.
Forca, o qirinj të shoqërisë!
(Ju e dini që qirinjtë ndriçojnë për të tjerë duke u shkrirë.)
Suksese të gjithëve atyre që punojnë me ndershmëri në arsim! Arsimi, kjo punë e rëndë si minierë!
Minatorët nxjerrin madem, arsimtarët talentet që do të udhëheqin nesër vendin.