Rakia e Skraparit, një “markë” autentike, e njohur që para 100 vjetësh
Një nga traditat më të lashta të traditës dhe kulturës shqiptare në shekuj të krahinave tona shqiptare është edhe prodhimi artizanal i rakisë.
Rakia është një nga pijet kryesore që shqiptarët e kanë përdorur dhe e përdorin edhe sot për gëzimet e tyre familjare, ceremonitë e dasmave, mikëpritjen e miqëve, etj. Vjeshta ka qënë edhe stina më e zënë e inspektorëve të bashkive në periudhën e administratës së Ahmet Zogut, të cilët shkonin në çdo fshat për të kontrolluar kazanët dhe vulosjen e mbylljes së tyre përpara proçesit të nxjerjes së rakisë.
Mbas inspektorëve, shkonin tagrambledhësit për marrjen e taksës sipas sasisë që fshatarët kishin prodhuar. Dhe një nga krahinat shqiptare, që është dalluar dhe dallohet për prodhimin dhe cilësinë e lartë të saj, është Skrapari.
Rakia, e prodhuar nga fshatrat e kësaj zone është njohur dhe njihet jo vetëm në Shqiperi, por edhe në Ballkan, Europë dhe më gjerë.
Sipas një dokumenti, i cili ruhet në Arkivin Qendror të Shtetit, datë 22 dhjetor 1929, 79 fshatrat e Skraparit kanë prodhuar gjithsej 21 872 kg raki, duke paguar si taksë: 4 374 franga ari.
Vendin e parë në prodhimin e saj, ndërmjet këtyre fshatrave, e zë fshati i Potomit me 2 720 kg, taksa e të cilit ka qënë gjithsej: 544 franga ari.
Më poshtë, prej listës së dokumentit të lartëpërmendur, po japim prodhimin e rakisë në 10 prej këtyre fshatrave të nënprefekturës së Skraparit.
Renditjen e fshatrave e kemi dhënë sipas sasisë së prodhimit të rakisë.
Nr. Fshati Sasia e rakisë Taksa e paguar
Potom 2 720 kg. 544 franga ari
Vendreshë 1 454 kg. 309 franga ari
Prishtë 810 kg. 169 franga ari
Sevran 795 kg 159 franga ari
Kuç 790 kg. 158 franga ari
Nishicë 789 kg 157 franga ari
Zabërzan 768 kg. 153 franga ari
Gjerbës 699 kg 139 franga ari
Visockë 684 kg. 136 franga ari
Muzhakë 649 kg. 129 franga ari
Kujtim Nuro:
Burimi: Arkivi Qendror i Shtetit (AQSH)