Rushan Dosti: Tomorricë e Zezë, Tomorricë e Bardhë!…
Rushan Dosti
Hapa Portën e Dëvrisë
Ç’mu shfaqe moj Tomorricë
Përjetova magjiëndërrën
Nga Skrapari në Koshnicë
Në ekranin e syve të mi
Shoh një film të paxhiruar
Bokërrimat e Tomorricës
Fletë libri palë – palë
Fletë libri zverdhur kohësh
Fustanellë krahëve të Tomorrit
Më shfaqen vëllezërit Frashëri
Dhe kujtimet e Fan Nolit
Luan i shtrirë, Mali i Tomorrit
Istikam, Qafa e Kulmakut
Guri i Prerë, Mali i Koshnicës
Më tregojnë gjurmët e gjakut
Përmbi fustanellë qëndisur
Qafa e Gjarpërit, Ostrovica
Nga Gramshi deri në Berat
Dielli vjen nga Tomorrica
Nga Qafë Pela vjen stoçeni
Dhe shpërthen në Gur të Prerë
Qafa e Gjarpërit këndon këngën:
“Ku të lashë moj e mjerë!”
Shtruar vallen e ka marrë
Lumi i vjetër i Tomorricës
Kënga gjymë e Demir Zykos
Zgjon rrënojat e Strafickës
Fustanellë në mbi dyzet fshatra
Hedhur krahëve palë – palë
Gjysma Tomorricë e Zezë
Gjysma Tomorricë e Bardhë!