Certifikatë Mirënjohje për Maturën 1973 të Gjimnazit “Ramiz Aranitasi”
Dy veprimtari mbresëlënëse të njëpasnjëshme janë zhvilluar këto ditë në gjimnazin “Ramiz Aranitasi” Çorovodë. Lajmi bëhet i ditur nga faqja zyrtare e Bashkisë së Skraparit dhe personalisht nga kryetari i kësaj Bashkie, Adriatik Mema.
Pardje, mes emocionesh dhe kujtimesh të shumta u zhvillua ceremonia e dhënies së Certifikatës “Mirënjohja e Skraparit” Maturës së vitit 1973, të Gjimnazit të qytetit të Çorovodës. Respekt dhe mirënjohje për këtë brez, për këta ish-maturantë që secili në fushën e tij i ka dhënë aq shumë shoqërisë.
Veprimtaria tjetër ka qenë një javë më parë, kur një ceremoni modeste, por shumë kuptimplotë u zhvillua me trupën pedagogjike të kësaj shkolle. Pesëmbëdhjetë kompjutera të dhuruar nga Prof. dr. Sherif Bundo dhe miqtë e tij iu shtuan laboratorit të IT së kësaj shkolle.
Të pranishëm ne ceremoninë e rastit ishin edhe një ekip pedagogësh nga Universiteti Poitiers në Francë, në të cilin Prof. Bundo lekton prej shumë vitesh.
