Hajri Xhamëni, “Robert Radoja i Çorovodës”
Tomorr Shasho
Gjatë bisedave të zhvilluara në emisionet televizive, artistët brilantë të muzikës, Zana Çela, motrat Libëhova Irma dhe Eranda, Emma Qazimi pyetjes “Si e keni filluar aktivitetin muzikor”? Përgjigjja ka qenë e menjëhershme: “Në Pallatin e Pionierëve Tiranë me mjeshtrin e madh Robert Radoja”.
Pastaj ato flasin me pasion e dashuri ndaj profesorit dhe nuk ndalojnë duke shprehur respektin ndaj tij, në qoftëse s’ndërhyn drejtuesja e emisonit me një pyetje tjetër.
I ndiqja me vemëndje bisedat e tyre dhe ndërmend më vinte Hajri Xhamëni,ky “Robert Radoja i Çorovodës”, me duar mbi tastierën e pianos, fytyra e shoqëruar me atë buzëqeshjen e ëmbël të drejtuar nga pionierët këngëtarë dhe kompleksin e pioniereve.
I ëmbël, ashtu si e përshkruanin artistet Robert Radojën, ashtu do të flisnin edhe Aurora Hajdini, Ermira Idërshaj për muzikantin Hajri Xhamni,ndaj dhe po e quaj dhe po e krahasoj me emrin e mjeshtrit të madh, sepse puna e përkushtimi i tij nuk ndryshon shumë nga ajo e Profesorit të Tiranës.
Hajriu kishte studiuar për mësuesi në degën e gjuhë – letërsisë,por pasioni për muzikën e ngacmonte në çdo moment. Pas mësimit e përgatitjes për mësimin e së nesërmes, do ta shikoje në vatrën e kulturës të fshatit Zabërzan duke mësuar audodidakt fizarmonikën.
Njohuritë për notat muzikore s’i mungonin, sepse i kishte mësuar në shkollën e mesme. Me dashurinë për muzikën e punën këmbëngulese arriti të bëhet një muzikant i përsosur, kompozitor dhe mjeshtër në orkestrimin e këngëve.
Në ato vite, kur kam bashkëpunuar me Hajriun, 1971-1975, në qytetin tonë s’kishte Shtëpi Pionieri. E tillë ishte ” kthyer” Shtëpia e Kulturës. Çdo mbasdite pionieret, Ermira Idërshaj, Aurora Hajdini, Liri Hysenllari, Roberta Vaso, Teuta Greva, Renata Zaimi (ndjesë për të tjera, që nuk më kujtohen) do t’i priste tek dera Hajriu (Likja) siç i thërrisnim ne.
E Shtëpia e Kulturës do të gumëzhinte nga zërat e pioniereve, të cilat i përgatiste për këngëtare Hajri Xhamëni.
Jo vetëm puna e palodhur me pionerët, por një mbrekulli ishte dhe kompleksi i mësuseve të shkollës “Kahreman Ylli” me Donika Pëllumbin, Lumturi Fushën, Valentina Kotobellin dhe tri mësuese vlonjate nën drejtimin e të palodhurit Hajri Xhamenit. Edhe pse me detyrën e drejtorit të Shtëpisë së Kulturës, fizarmonikën dhe drejtimin e bandës së qytetit nuk e shkëputi.
Janë shumë këngë të kompozuara nga i talentuari Hajri Xhamëni, të cilat janë kënduar edhe në festivalet e pionierëve në Shkodër duke zënë vende nderi, por ajo që përloti një sallë, që spektatorët “harruan” të uleshin dhe të pushonin duartrokitjet, do të mbetet kompozimi i këngës kushtuar borizanit të “Tendës së Qypit”, Haki Kapaj, e kompozuar nga Hajriu, me tekst të regjizorit Edmond Agolli, kënduar nga kompleksi i pionierëve në prani të vet borizanit Haki Kapaj, lotët e të cilit shoqëronin atë melodi aq emocionale.