Ra për çlirimin e Tiranës: Lavdi Heroit të Popullit Estref Caka (Osoja)!…
Luman Caka
Sot, në ditën e rënies për çlirimin e Tiranës, i them Heroit të Popullit Estref Abdurraman Osojës, bashkëfshatarit tim:
Estref, banor i përjetësisë, banor i panteonit të rralluar, ti nuk ke vdekur, ti je gjallë!
Se ti u ngrite trimërisht në yllësi. Se miliona ikin, vdesin, shuhen, harrohen dhe zhduken si vesa, por ti me fisin tënd të heronjve nuk e njihni vdekjen!
Ti ndrin e rrezaton si yjësia e kupës së qiellit natën e majit mbi Tomorrin tonë të shenjtë.
Ne mburremi e krenohemi me sojin e yjeve, se kur shkelim rrallë e për mall bulevardet e Tiranës, kujtojmë gjakun që derdhe ti, biri ynë, biri i Osojës, i Skraparit e i Shqipërisë në mëesin e nëntorit të vitit 1944.
Atje në varret ku prehen eshtrat e nënë Nerënxës, nënës që ty të dha jetë dhe ne na dha krenari, endet mirënjohja jonë e thellë e çdo kohe, e çdo nëntori.
Yjet rrezatojnë dritë.
Jeni Ju, bijtë e Shqipërisë që na ndriçoni pa pushim!
Në jetë të jetës Përjetësi!