Servilizmi

 

 

— Mos fol, moj dinake dhelpër!

 

Servile gjithë kohën ke mbetur.

 

Edhe kur ecën, kudo që shkon,

 

bishtin sa majtas-djathtas e çon.

 

Qeshi dhelpra: ha… ha… ha!…

 

— Më budalla se çakalli nuk ka!

 

Unë bishtin majtas-djathtas e kam tundur,

 

Po më thuaj: kush nga servilizmi ka humbur?

 

 

 

Pula dhe Këndesi

 

 

I thotë pula këndesit:

 

— I dashur këndes,

 

libër paske botuar?

 

I përgjigjet këndesi:

 

— Ty s’të jap dot,

 

i kam të limituar!…

 

 

 

Kokoshi mburravec

 

 

Gjel kokoshi mendjemadh

 

u mburrej pulave majë një huri.

 

Me të parë zonjën dhelpër,

 

fluturoi drejt te hahuri.

 

 

 

Zgjuarësia

 

 

— Jam shumë e zgjuar! — thoshte dhelpra.

 

Mburrej dhe tundte bishtin si dragua.

 

Sapo dëgjoi të lehurat e qenit,

 

futi bishtin ndër shalë dhe u largua.

 

 

 

Delja syskë e turpëruar

 

 

Delja Syskë rri e turpëruar,

 

se dhia Çile e mban zbuluar?!

 

I thotë Kaleshja me qetësi:

 

— Jo, teze! Kot shqetësohesh.

 

Shiko “Përputhen” dhe mësohesh!…

 

 

 

Kali dhe gomari

 

 

Kali dhe gomari ecnin të ngarkuar.

 

Kali shpejtonte hapat,

 

gomari shtruar-shtruar.

 

— Shpejto hapat! — e qortoi kali.

 

Qetë-qetë përgjigjet gomari:

 

— Kush shpejton në këtë botë,

 

mund të bjerë edhe në gropë.

 

 

 

Betimi

 

 

Hipur mbi një gur të lartë,

 

Shokëve u betohej ujku plak:

 

“T’mos më mbetet këmbë e dorë,

 

Po s’e hëngra sot dashin me këmborë.”

 

Në darkë u nis avash-avash,

 

U mbështet pas kërcurit të trashë.

 

Priti tërë natën me sytë nga qielli,

 

Deri në mëngjes, sa e zuri dielli.

 

Ikte rrugës, menduar-menduar,

 

Dhe nuk rrinte pa u betuar:

 

“T’mos më mbetet këmbë e dorë,

 

Po s’e hëngra sot dashin me këmborë.”