Tërpollari Law, një histori suksesi në Amerikë
Nga Hajri Nuhu
Kjo është logo dhe partner – anëtarët e firmës ligjore të emingracionit në Jacksoville, Florida në SHBA. Emri Tërpollari & Tërpollari, LLC.
Nuk janë rreshtat e këtij shkrimi reklamë. Reklamën e bën puna plot kompetencë e dy intelektualëve që janë integruar në jetën amerikane. Ato janë “reklamë krenarie” për ata djem e vajza që i bëjnë nder emrit shqiptar përqark globit.
Të tillë janë Daniel e Aurora Tërpollari.
Daniel & Aurora
“Dardha, nën dardhë bie”. Nuk mund të ndodhte ndryshe. Ai është djali i Ibrahim Tërpollarit.
Për inxhinier Bimin, një personalitet në Skrapar, një figurë e dashur publike në Poliçan, kemi shkruar. Një mandat ka qënë kryetar i Bashkisë. Ai dhe Mjaftonia, mësuese rritën e edukuan dy djem, që në mënyrën dhe me punën e tyre i bëjnë ata krenarë .
Danieli apo Dani si e thërrasin atje, mbaroi shkollën e mesme në Poliçan, vazhdoi Fakultetin Ekonomik në Tiranë dhe më pas shkoi në Gjermani. Pas specializimit, viza amerikane i dha mundësinë për një diplomë tjetër për Kontabilitet e Financë në kolegjin Anna Maria. Më pas u doktorua me vlerësime maksimale edhe në shkollën juridike në Masaçusetes në New Hampshire. Ishte edhe profesor ndihmës i drejtësisë në kolegjin Backer.
Përpara se të hidhnin hapin drejt firmës së tyre, Dani mbante pozicionin e Auditorit të Brendshëm në TYCO Simplex-Grinnell dhe më parë ishte i punësuar si drejtor i Logjistikës nga Kryqi i Kuq Francez në Evropë.
Flet rrjedhshëm plot pesë gjuhë. Gjatë studimeve ai njohu Aurorën, vajzën nga Elbasani. Ajo vinte nga Oklahoma dhe mori diplomën e saj Bachelor nga Universiteti Shtetëror Worcester. Në kolegjin ekonomik përfundoi me rezultate të shkëlqyera. Njëlloj si Danieli. Gjatë studimeve në shkollën juridike ishin të parët. U doktoruan të dy. Aurora fitoi titullin e saj Juris Doctor me nderime, Magna Cum Laude.
Siç kujton Mjaftonia edhe për fjalën përshëndetëse mes studentëve duhet të fliste njëri prej tyre. Kamerat u drejtuan tek ata. Ishin vitet e para. Njerëzit e shumtë dëgjuan për vendin nga vinin. Kishte kuriozitet. Shumica nuk kishin njohuri, nuk e dinin se ku binte Shqipëria. Kemi provuar emoncione të mëdha”.
Tërpollari Law-histori suksesi
Në vitin 2010 mori udhë ideja për një firmë juridike për çështje të emigracionit e të biznesit. Mund t’i vinin firmës një emër tjetër. Por jo. Tërpollari ishte më mirë, në respekt të origjinës dhe të sakrificës së prindërve, të brezit të tyre në tërësi.
Kështu mendon Aurora që tashmë është edhe anëtare e shoqatës amerikane të juristëve të emigracionit. Plot 22 vjet në Worcester. Njohje pafund mes shqiptarëve. Natyra e punës së çiftit Tërpollari i bëri ata me miq e shokë. Jo vetëm shqiptarë, por nga komunitete të ndryshme.
Në veprimtaritë e komunitetit për festën e Pavarësisë jane të parët. Të parët edhe në ndihmën ndaj kishës shqiptare që përdorej për njerëz në nevojë kryesisht emograntë. Televizone të ndryshme, edhe ai për shqiptarët në Boston, i bënë jehonë punës së tyre. Po bëjnë dy vjet që ata u zhvendosën në Florida.
“Të dy avokatët e imigracionit po bëjnë një punë të shkëlqyer në zyrën e tyre, duke ndihmuar klientët me nevojat e tyre per imigracion, duke përfshirë bashkimet familjare, vizat e investimit, Green-Card-ën nëpërmjet punësimit, dhe shumë fusha të tjera. Ata ndajnë histori suksesi dhe keshilla të dobishme, duke e bërë procesin ligjor më të lehtë për t’u kuptuar”.
Kështu shkruhen në portalin për emisionin televiziv “Shqiptarët nëpër botë”.
Në një intervistë me Lida Zaimin, Aurora rrëfen vështirësitë e fillimit dhe sfidat me të cilat përballet secili emigrant. Ajo dhe Danieli shprehin gatishmërinë, por edhe ndjeshmërinë ndaj çdo shqiptari. Kur kanë klientë shqiptarë dhe sidomos skraparllinj “të panjohur” telefonojnë Bimin e Mjaftoninë.
“Me krenari më thoshin që kishin ndihmuar vajzën e Teki Bregut në Florida. U gëzova pa masë se ruajmë respekt për atë mësues e kuadër të nderuar” – thotë Mjaftonia. Shumë raste të tilla. Punën e bëjnë si profesionistë, por me dashuri e respekt ndaj njerëzve.
Mjafton të shohësh faqen “Tërpollari Law” për të kuptuar këtë fakt. Janë mijra ndjekës, pesëmijë klientë të kësaj firme dhe numuri rritet. Krenari. Emër të mirë për veten, prindërit, vendin!